Blog

Ursicin G.G. Derungs (1935-2024) è naschì e ceschì si a Vella. Matura a Mustér ed entrada en claustra. Studi da teologia a Roma, doctorat e professura a Roma e Tübingen. Extrada da l’urden. A partir dal 1975 fin tar sia mort el vivì a Milaun.

Ursicin G.G. Derungs ha scrit regularmain per diversas gasettas rumantschas, tudestgas e talianas. El ha publitgà tranter auter: «Il Saltar dils morts», «Siemi de mesastad», «Il cavalut verd ed auter» e «La petta de spigias». El ha procurà per la translaziun en sursilvan dal raquint autobiografic «Sche quei ei in carstgaun» da Primo Levi, cumparì dal 2011 tar la CER.

Derungs ha retschet dal 1999 il premi da litteratura da la Fundaziun Schiller Svizra, 2004 il premi da renconuschientscha dal Chantun Grischun ed il premi Ignazio Silone per la translaziun Fontamara.

Gianna Duschletta (1999) è creschida si a S-chanf en ina famiglia engiadinaisa-tessinaisa. Suenter la matura a l’Academia Engiadina a Samedan ha ella studegià a la Scola auta da pedagogia da Berna e lavura oz sco magistra per il stgalim aut.

Gianna Duschletta ha gia publitgà diversas istorgias en ediziuns ladinas, p.ex. en la Chasa Paterna u en il Chalender Ladin. Dapi il 2021 scriva ella regularmain per l’emissiun Impuls da RTR. L’onn 2023 è cumparida ina tscherna da ses texts en l’ediziun bilingua «Baderledas und Einsichten» (chasa editura Nada). Il crimi per giuvenils «Affers da famiglia» è cumparì dal 2025 tar la Chasa Editura Rumantscha.

Foto: Mayk Wendt

Jürg Gautschi (1963) è creschì si a Trun. El ha studegià scolast secundar a l’Universitad da Friburg e pedagogia da teater a la Scol’auta dals arts da Berna. El ha lavurà blers onns sco schurnalist da televisiun, autur da films documentars e producent d’emissiuns da musica live. Dapi il 2020 è el responsabel per ils «Cuntrasts» da Radiotelevisiun Svizra Rumantscha. Daspera è Jürg Gautschi autur e teatrist. Fin oz ha el scrit oravant tut prosa curta e plirs tocs per la tribuna. La gronda part dals texts en quest cudesch èn naschids per l’emissiun «Impuls» dal Radio Rumantsch.
L’onn 2005 ha Jürg Gautschi retschet il Premi Term Bel ed il Premi dal public als Dis da Litteratura a Domat. Dal 2023 è el stà in dals victurs da la concurrenza Opennet dals Dis da Litteratura da Soloturn.

La rimnada d’istorgias curtas «Cunterfem» è cumparì dal 2023.

Hubert Giger (1958) è naschì a Matergia en la Val Medel e creschì si là. El ha studegià istorgia a l’universitad da Turitg ed è sa spezialisà sin la scienza da strias dal Grischun. Giger ha scrit divers texts per differentas retschas (Ischi; Calender per mintga gi). Dal 2001 ha el publitgà sia ovra da standard «Hexenwahn und Hexenprozesse in der Surselva» en la collecziun «Quellen und Forschungen zur Bündner Geschichte».

Sia ovra da success «La stria da Dentervals» è cumparida dal 2011 tar la CER ed en il fratemp era per tudestg e franzos.

Toni Halter (1914-1986) è creschì si a Valata/Surcuolm. El è stà scolast secundar a Vella ed è s’engaschà per la cultura e politica locala e regiunala.
Halter ha publitgà numerusas ovras, tranter auter: «Fumegl Bistgaun», «Il misteri da Caumastgira», «Patricia», «Fein selvadi», «Culan da Crestaulta» (Chasa Editura Rumantscha), «Il cavalè dalla Greina» e «Diari suenter messa».

Toni Halter ha retschavì il premi da la Cuminanza rumantscha da radio e televisiun ed il premi grischun da cultura.

Asa Hendry (1999) lavura en il sectur da litteratura, teater e performance. Iel è creschì si a Vella en Val Lumnezia, ha studegià scienza da teater e gender studies a Berna e scienza da teater applitgada a l’Universitad da Justus Liebig a Giessen en Germania. Asa Hendry ha retschavì l’onn 2021 il Premi grischun da litteratura per ses roman «Sin lautget» ed è vegnì undrà il 2026 cun il Premi svizzer da litteratura per ses text da teater «archiv».
Asa Hendry viva a Giessen ed en il Grischun. Iel scriva e reflectescha al cunfin tranter muntogna e queerness.

Chatrina Josty (1984) è creschida si a Bravuogn. Ella ha lavurà divers onns sco redactura e moderatura tar Radiotelevisiun Svizra Rumantscha e suenter sco magistra da scola primara. Ella ha scrit divers «Impuls» per il Radio Rumantsch ed ha publitgà texts da divers geners en antologias, tranter auter en «mintga di» (2015).

«Barbacor – Herzkater» è cumparì sco tom 1 en la retscha Ord chadaina (2018).

Luzius Keller (1938) ha studegià a Turitg, Genevra e Firenza. Segiurns a Roma, Firenza e Berlin. Dal 1970 fin al 2003 professer per scienza litterara franzosa a l’Universitad da Turitg. Publicaziuns en connex cun la litteratura dapi la renaschientscha, en spezial davart Marcel Proust. Editur da l’ediziun da Francfurt da las ovras da Proust (14 toms), coeditur da l’enciclopedia da Proust (2009). Plinavant studis davart la lirica da la Svizra quadrilingua, tranter auter l’antologia Modern and Contemporary Swiss Poetry (2012).

«Quarta Lingua Quadrophon» è cumparì sco tom 2 en la retscha Ord chadaina (2018).

Göri Klainguti (1945) è in scrivent e pur da l’Engiadin’Ota. El ha studegià a l’universitad da Turitg ed è sa deditgà suenter plirs onns sco magister dal tut al scriver e dissegnar. Sper las activitads artisticas ha el manà in bain puril a Samedan.
Göri Klainguti ha publitgà regularmain en il «Chalender Ladin» ed en la «Chasa Paterna» e scrit contribuziuns per l’emissiun «Impuls» da RadioTelevisiun Rumantscha.

El ha publitgà pliras ovras, tranter auter: «Linard Lum» (UdG); «L’ü» (UdG) e «Na, ogets nu discuorran!» (Chasa Editura Rumantscha).

Tim Krohn (1965) è autur da numerus romans e teaters. El viva cun sia dunna, la scriptura Micha Friemel, e lur quatter uffants a Sta. Maria en Val Müstair. Els mainan là era la Chasa Parli, in lieu da retratga per artistas ed artists e per persunas reflectantas. www.chasa-parli.ch

El ha scrit il text da basa per il comic «Pippin il patgific», cumparì tar la Chasa Editura Rumantscha (2021).