Blog

Dumenic Andry (1960) è creschì si a Ramosch. El ha studegià romanistica a l’Universitad da Turitg e publitgescha texts en revistas e gasettas, plinavant è el d’udir regularmain en l’emissiun «Impuls» al Radio Rumantsch. El ha publitgà divers cudeschs, tranter auter: «Roba da tschel muond» (Artori) ed «Uondas» (editionmevinapuorger).
Dumenic Andry ha retschavì il Premi da promoziun dal chantun Grischun ed il Premi da la Fundaziun Schiller. Plirs da ses texts èn stads nominads per il Premi Term Bel als Dis da litteratura a Domat.
El è romanist ed abita a Zuoz.

Cumparì tar la Chasa Editura Rumantscha:
– Zina zina zana (2023)
– sablun (2017)

Flurina Badel (1983) è artista ed autura. Suenter ina scolaziun da schurnalissem ed in studi da communicaziun e lavur publica, ha ella lavurà tranter auter sco cineasta e moderatura. Flurina Badel ha absolvì il Master of Fine Arts a l’Institut Art Gender Nature da la HGK FHNW a Basilea ed ha studegià a l’Institut per art litterara da l’Universitad d’art applitgà a Vienna. Ella scriva e performescha texts litterars en diversas linguas. L’onn 2019 è cumparì ses emprim tom da poesias «tinnitus tropic» (editionmevinapuorger) ch’è vegnì premià cun il Premi Svizzer da Litteratura 2020.

«Tschiera» è ses emprim roman.

Foto: Juliette Chrétien

Linard Bardill (1956) è naschì a Cuira. Gia curt suenter ses studi da teologia a Turitg è el sa deditgà al scriver creativ ed al cumponer. Sco chantautur ed autur è el preschent passa 4o onns sin camp naziunal cun albums musicals, teaters, programs da tribuna, cudeschs da poesias, romans e cudeschs d’uffants. Linard Bardill ha survegnì divers premis sco p. ex. il Deutscher Kleinkunstpreis ed il Salzburger Stier.
El s’exprima regularmain en moda critica davart temas dal temp en blogs e columnas. Dapi 2020 è el manader dal WorldEthicForum a Puntraschigna.
Linard Bardill è bab da 5 uffants creschids e viva a Scharans.

Cumparì tar la Chasa Editura Rumantscha:
– Terra pels peis/Den Füssen ein Grund (2023)
– Furbaz e Lumpaz (2018)

Cla Biert (1920-1981) è creschì si a Scuol ed è stà magister, autur e trubadur. El è s’engaschà fermamain per la cultura e lingua rumantscha.
Biert ha publitgà numerus cudeschs; cun ses roman «La müdada» dumbra el tar ils impurtants auturs rumantschs.
Biert ha retschavì l’onn 1955 il premi da la fundaziun Schiller svizra e pli tard il premi da la Cuminanza Radio Rumantsch e dal chantun Grischun.

«L’odur dal füm» è cumparì per il 100avel anniversari e cuntegna ina racolta da raquints, cun commentars e fotografias da ses album.

Attilio Bivetti (1945) è naschì a Vicosoprano. El ha visità la scola primara a Samedan ed absolvì il gimnasi a Son Gagl. Suenter il studi da veterinari a Turitg ha Bivetti lavurà 30 onns sco veterinari en l’Engiadin’Ota ed en Bergaglia. Dasperas è el stà plirs onns president communal a Segl.
Dapi la pensiun l’onn 2009 viva el tranter Segl, Fex e Castasegna. Bivetti ha in egl ed ina lingua originala per descriver la dinamica sociala ed economica da sias vals alpinas.
Publicaziuns: «Ventins e ventatschs da Fex» (Chasa Paterna).

Cumparì tar la Chasa Editura Rumantscha:
– L’aungel da Nuot Nes (2017)
– Nuot Nes (2014)

Madlaina Bundi (1972) ha scrit sco istoricra diversas publicaziuns tar l’istorgia sociala ed economica Svizra, tranter auter davart il moviment per la protecziun da la patria e da la natira, sco era tar la politica da l’ambient e da la cultura en il 20avel tschientaner.

Dal 2013 è cumparì tar la Chasa Editura Rumantscha «charas aspectaturas, chars aspectaturs» a chaschun dal giubileum da 50 onns Televisiun Rumantscha.