Blog

Selina Dacy Cadonau (1981) è naschida en l’India, vegnida adoptada e creschida si a Scuol. Suenter la scola auta da pedagogia ed in studi da medischina alternativa, ha ella lavurà durant diesch onns sco mussadra, è ella oz activa sco coach da transfurmaziun. En ses temp liber malegia ella e scriva il blog «adoptiertundhappy.blogspot.com».
Selina Dacy Cadonau lavura e viva a Köniz, Berna.

«Nuala – La diala da las nüvlas (vallader)/La diala dals nivels (rg)» è cumparì dal 2022 tar la Chasa Editura Rumantscha.

Viola Cadruvi (1992) è creschida si giu la Bassa en ina chasada rumantsch-tudestga. Ella ha studegià germanistica, istorgia e rumantsch. Viola Cadruvi scriva dapi onns regularmain e publitge­scha en divers periodics. L’onn 2014 ha ella gudagnà il Premi Term Bel per sia istorgia «La dunna da Benedetg Albin» e 2018 il premi dal public per «La curridra».

Dal 2020 è cumparì tar la Chasa Editura Rumantscha il titel «La feglia dal fraissen» en la retscha Ord chadaina.

Carin Caduff (1988) è creschida si a Vattiz en la Val Lumnezia. Ella ha fatg in emprendissadi sco commercianta a Mustér. Oz viva ella a Wädenswil (ZH) e lavura sco pedagoga sociala nua ch’ella porscha tranter auter er ateliers da scriver per carstgauns cun impediments. Carin Caduff scriva regularmain columnas per «La Quotidiana», «Impuls» per Radio Rumantsch ed ha publitgà divers da ses texts en il magazin «La Litteratura».

Cun «Furt e naven!» (Chasa Editura Rumantscha) ha ella preschentà dal 2022 sia emprim’ovra.

Arno Camenisch è naschì 1978 a Tavanasa; el ha studegià a l’Institut svizzer per Litteratura a Bienna.
Ses emprim cudesch ernesto ed autras manzegnas ha el publitgà 2005 (Ediziuns Romania). Igl onn 2009 cumpara Sez Ner, 2010 suonda Hinter dem Bahnhof, 2012 Ustrinkata e 2013 Las flurs dal di (tuts tar: Engeler Verlag).
Camenisch ha retschiert divers premis, tranter auter il premi da Litteratura dal chantun Berna, il premi Schiller da la banca chantunala da Turitg e 2013 il premi federal da litteratura.

Dal 2010 è cumparì tar la Chasa Editura Rumantscha Sez Ner sco cudesch auditiv biling rumantsch/tudestg.

www.arnocamenisch.ch

Foto: Yvonne Böhler

Theo Candinas (1929-2020) da Surrein, è stà suenter ses studi a las universitads da Friburg, Paris e Perugia blers onns magister a Cuira. Dasperas ha el lavurà sco redactur, translatur, schurnalist, columnist ed autur. El ha scrit poesias, dramas, gieus auditivs, prosa satirica curta e romans. Cunzunt ils onns 70 ha Theo Candinas muventà la Rumantschia, cun rumper tabus socials e religius, tranter auter cun sias istorgias da Gion Barlac.

Candinas ha retschet plirs premis; 1971 in premi da renconuschientscha da la Fundaziun Schiller, 1990 il premi da renconuschientscha dal Chantun Grischun.

Publicaziuns tar la Chasa Editura Rumantscha:
Gion Barlac (cudesch) (2012)
Gion Barlac (cudesch auditiv) (2012)

Linard Candreia (1957) è creschi si a Casti. El scriva cunzunt istorgias curtas, rapports da viadi e biografias per surmiran e tudestg. Fin ussa èn cumparids ina dunsaina cudeschs dad el, tranter auter: «Notiztgas dalla Sicilia», «Crappa da sulada – Pflastersteine», «miniaturas – miniaturen» e las duas ediziuns cumparidas tar la CER.
Linard Candreia ha instruì fin tar sia pensiun linguas ed istorgia al progimnasi a Laufen.

Cumparì tar la Chasa Editura Rumantscha:
Prosa surmirana – Da se cò (2022)
Hanna la Tirolra – Hanna die Südtirolerin (2013)

Roman Caviezel (1950) da Glion, viva a Cuira. El ha studegià romanistica a Basilea, Paris e Firenze. Suenter è el stà magister gimnasial da franzos e talian a Basilea, Muttenz e plirs decennis a Cuira. Roman Caviezel scriva regularmain columnas per «La Quotidiana» e dapi intgins onns era texts per l’emissiun  «Impuls» da RadioTelevisiun Svizra Rumantscha.

L’onn 2020 ha el gudagnà il premi dal public dal Premi Term Bel als Dis da litteratura.

«Palaver for ever» è cumparì sco 10avel tom en la retscha Ord chadaina (2024).

Simona Demarmels (1992) è naschida e creschida si a Salouf. Ella ha scrit il roman da fantasy «Semperverd» ensemen cun Anna Negrini sco lavur da diplom en il rom da sia scolaziun sco magistra primara a la Scola auta da pedagogia dal Grischun a Cuira (2013–2016).

Aita Dermont-Stupan (1957) è naschida e creschida si a Sent. Ella ha avsolvì il Seminari da magisters a Cuira e lavurà sco scolasta en diversas scolas. Suenter la scolaziun avanzada sco translatura a la SAL a Cuira ha ella scrit regularmain per gasettas, retschas e magazins (t.a. Chalender Ladin, Dun da Nadal, Litteratura, Funtaunas, mintga di). Ella ha translatà divers cudeschs, chanzuns e poesias per uffants en rumantsch grischun, tranter auter il cudesch «Globi en il Parc Naziunal», cumparì dal 2016 tar la CER.