Kategorie: auturAs

Arno Camenisch è naschì 1978 a Tavanasa; el ha studegià a l’Institut svizzer per Litteratura a Bienna.
Ses emprim cudesch ernesto ed autras manzegnas ha el publitgà 2005 (Ediziuns Romania). Igl onn 2009 cumpara Sez Ner, 2010 suonda Hinter dem Bahnhof, 2012 Ustrinkata e 2013 Las flurs dal di (tuts tar: Engeler Verlag).
Camenisch ha retschiert divers premis, tranter auter il premi da Litteratura dal chantun Berna, il premi Schiller da la banca chantunala da Turitg e 2013 il premi federal da litteratura.

Dal 2010 è cumparì tar la Chasa Editura Rumantscha Sez Ner sco cudesch auditiv biling rumantsch/tudestg.

www.arnocamenisch.ch

Foto: Yvonne Böhler

Theo Candinas (1929-2020) da Surrein, è stà suenter ses studi a las universitads da Friburg, Paris e Perugia blers onns magister a Cuira. Dasperas ha el lavurà sco redactur, translatur, schurnalist, columnist ed autur. El ha scrit poesias, dramas, gieus auditivs, prosa satirica curta e romans. Cunzunt ils onns 70 ha Theo Candinas muventà la Rumantschia, cun rumper tabus socials e religius, tranter auter cun sias istorgias da Gion Barlac.

Candinas ha retschet plirs premis; 1971 in premi da renconuschientscha da la Fundaziun Schiller, 1990 il premi da renconuschientscha dal Chantun Grischun.

Publicaziuns tar la Chasa Editura Rumantscha:
Gion Barlac (cudesch) (2012)
Gion Barlac (cudesch auditiv) (2012)

Linard Candreia (1957) è creschi si a Casti. El scriva cunzunt istorgias curtas, rapports da viadi e biografias per surmiran e tudestg. Fin ussa èn cumparids ina dunsaina cudeschs dad el, tranter auter: «Notiztgas dalla Sicilia», «Crappa da sulada – Pflastersteine», «miniaturas – miniaturen» e las duas ediziuns cumparidas tar la CER.
Linard Candreia ha instruì fin tar sia pensiun linguas ed istorgia al progimnasi a Laufen.

Cumparì tar la Chasa Editura Rumantscha:
Prosa surmirana – Da se cò (2022)
Hanna la Tirolra – Hanna die Südtirolerin (2013)

Roman Caviezel (1950) da Glion, viva a Cuira. El ha studegià romanistica a Basilea, Paris e Firenze. Suenter è el stà magister gimnasial da franzos e talian a Basilea, Muttenz e plirs decennis a Cuira. Roman Caviezel scriva regularmain columnas per «La Quotidiana» e dapi intgins onns era texts per l’emissiun  «Impuls» da RadioTelevisiun Svizra Rumantscha.

L’onn 2020 ha el gudagnà il premi dal public dal Premi Term Bel als Dis da litteratura.

«Palaver for ever» è cumparì sco 10avel tom en la retscha Ord chadaina (2024).

Simona Demarmels (1992) è naschida e creschida si a Salouf. Ella ha scrit il roman da fantasy «Semperverd» ensemen cun Anna Negrini sco lavur da diplom en il rom da sia scolaziun sco magistra primara a la Scola auta da pedagogia dal Grischun a Cuira (2013–2016).

Aita Dermont-Stupan (1957) è naschida e creschida si a Sent. Ella ha avsolvì il Seminari da magisters a Cuira e lavurà sco scolasta en diversas scolas. Suenter la scolaziun avanzada sco translatura a la SAL a Cuira ha ella scrit regularmain per gasettas, retschas e magazins (t.a. Chalender Ladin, Dun da Nadal, Litteratura, Funtaunas, mintga di). Ella ha translatà divers cudeschs, chanzuns e poesias per uffants en rumantsch grischun, tranter auter il cudesch «Globi en il Parc Naziunal», cumparì dal 2016 tar la CER.

Ursicin G.G. Derungs (1935-2024) è naschì e ceschì si a Vella. Matura a Mustér ed entrada en claustra. Studi da teologia a Roma, doctorat e professura a Roma e Tübingen. Extrada da l’urden. A partir dal 1975 fin tar sia mort el vivì a Milaun.

Ursicin G.G. Derungs ha scrit regularmain per diversas gasettas rumantschas, tudestgas e talianas. El ha publitgà tranter auter: «Il Saltar dils morts», «Siemi de mesastad», «Il cavalut verd ed auter» e «La petta de spigias». El ha procurà per la translaziun en sursilvan dal raquint autobiografic «Sche quei ei in carstgaun» da Primo Levi, cumparì dal 2011 tar la CER.

Derungs ha retschet dal 1999 il premi da litteratura da la Fundaziun Schiller Svizra, 2004 il premi da renconuschientscha dal Chantun Grischun ed il premi Ignazio Silone per la translaziun Fontamara.

Gianna Duschletta (1999) è creschida si a S-chanf en ina famiglia engiadinaisa-tessinaisa. Suenter la matura a l’Academia Engiadina a Samedan ha ella studegià a la Scola auta da pedagogia da Berna e lavura oz sco magistra per il stgalim aut.

Gianna Duschletta ha gia publitgà diversas istorgias en ediziuns ladinas, p.ex. en la Chasa Paterna u en il Chalender Ladin. Dapi il 2021 scriva ella regularmain per l’emissiun Impuls da RTR. L’onn 2023 è cumparida ina tscherna da ses texts en l’ediziun bilingua «Baderledas und Einsichten» (chasa editura Nada). Il crimi per giuvenils «Affers da famiglia» è cumparì dal 2025 tar la Chasa Editura Rumantscha.

Foto: Mayk Wendt

Jürg Gautschi (1963) è creschì si a Trun. El ha studegià scolast secundar a l’Universitad da Friburg e pedagogia da teater a la Scol’auta dals arts da Berna. El ha lavurà blers onns sco schurnalist da televisiun, autur da films documentars e producent d’emissiuns da musica live. Dapi il 2020 è el responsabel per ils «Cuntrasts» da Radiotelevisiun Svizra Rumantscha. Daspera è Jürg Gautschi autur e teatrist. Fin oz ha el scrit oravant tut prosa curta e plirs tocs per la tribuna. La gronda part dals texts en quest cudesch èn naschids per l’emissiun «Impuls» dal Radio Rumantsch.
L’onn 2005 ha Jürg Gautschi retschet il Premi Term Bel ed il Premi dal public als Dis da Litteratura a Domat. Dal 2023 è el stà in dals victurs da la concurrenza Opennet dals Dis da Litteratura da Soloturn.

La rimnada d’istorgias curtas «Cunterfem» è cumparì dal 2023.