Kategorie: auturAs

Anna Negrini (20.04.1992) è naschida e creschida si a Savognin. Il novavel onn da scola ha ella visità al gimnasi da la scola chantunala a Cuira. – Sper blers texts per la columna rumantscha “Convivenza” da las gasettas “La Quotidiana” e “Südostschweiz” ha ella era scrit il roman da fantasy «Semperverd» ensemen cun Simona Demarmels. Quai è stà sia lavur da diplom en il rom da la scolaziun sco magistra primara a la Scola auta da pedagogia dal Grischun a Cuira (2013–2016).

Anna Negrini è morta ils 07.09.2016 suenter greva malsogna.

Mario Pacchioli (1981) crescha si en Sursvela en ina famiglia passiunada per la musica. Gia baud entscheiva el sia instrucziun classica da chant e clavazin. Suenter il Seminari scolastic dal Grischun sa deditgescha el cumplainamain a la musica. L’onn 2004 sa participescha Mario Pacchioli a l’emissiun da televisiun «MusicStar» e vegn enconuschent en l’entira Svizra. Cun 23 onns obtegna el sia emprima platta d’aur. A Los Angeles sa perfecziunescha el sco pianist e cumponist e sa renda lura a Paris, nua ch’el absolva l’onn 2012 la scolaziun d’actur. 2013 scriva el, ensemen cun il chantadur svizzer Laurent Brunetti, il recital da chanson «Pêcheurs de Rêves» ed ensemen sa presechntan ils dus artists per l’entir mund enturn.
Sco artist independent lavura el sco musicist, chantadur ed actur. Sia gronda passiun è da cumponer ed arranschar musica per texts en differentas linguas e da differentas tempras, texts che tutgan el en ses profund. Mario Pacchioli viva tranter la Frantscha e la Svizra, el ha ragischs talianas e ses cor batta per sia patria rumantscha; quella varietad culturala dat la tempra a l’ovra sinfonica REMAS (2017).

Valentina Parolini (*1992) è naschida e creschida si a Samedan, nua ch’ella ha fatg la matura bilingua. Dal 2012 ha ella cumenzà il studi a la Scol’auta da pedagogia da Turitg ed ha frequentà las prelecziuns da rumantsch a l’Universitad da Turitg. L’onn 2018 ha ella terminà ses studi sco magistra dal stgalim aut cun rumantsch sco rom supplementar. Ella lavura sco scolasta secundara.

«La melodia da la gïa» (2022) è ses emprim crimi.

Foto: Maurin Bisig

Andri Peer (1921-1985) è naschi a Sent. El ha frequentà il Seminari da magisters a Cuira e lura studegià romanistica a Turitg e Paris. Peer è stà magister da gimnasi per talian e franzos a Winterthur (1952–1983) e docent per lingua e litteratura rumantscha a l’universitad da Turitg. El è era s’engaschà sco suprastant da l’Uniun da scripturs rumantschs, l’Uniun da scripturs svizzers e sco president dal P.E.N.-Club da la Svizra taliana e franzosa. Numerusas publicaziuns da poesias, raquints, dramas, dad essais e lavurs schurnalisticas tranter 1946 e 1986. Influenzà da la lirica europeica moderna sviluppa Andri Peer novas furmas liricas e sa fa in num sco innovatur da la poesia rumantscha. Dentant ha el experimentà er cun texts en prosa da divers geners.

Dal 2016 è cumparì tar la Chasa Editura Rumantscha il cudesch «Andri Peer – Prosa 1945-1985» en in’ediziun bilingua.

Oscar Peer (1928-2013) è naschì a Lavin. Ses onns da scola ha el passentà a Zernez e Lavin. Suenter il seminari da scolastas a Cuira ha el lavurà dus onns sco magister e lura studegià romanistica a Turitg e Paris. El è stà scolast a la scola media da Winterthur e suenter – fin tar sia pensiun – docent al seminari da scolasts a Cuira.

Dad el èn cumparidas numerusas ovras en rumantsch e tudestg: Eine Hochzeit im Winter (1972), Accord (1978), Eva (1980), Viadi sur cunfin (1981), Grenzstation (1994), Novas d’inviern (1988), Il grond Corradi (1990), Gärten über dem Strom (1993), La Chasa veglia (1999), La rumur dal flüm (1999), In tschercha dal figl (2005). D’impurtanza linguistica è ses vocabulari ladin-tudestg (1962).

Oscar Peer ha retschet ils sequents premis: 1977 Schillerpreis; 1983 Premi da renconuschientscha dal chantun Grischun; 1995 premi da Radio e Televisiun Rumantscha; 2003 Premi da cultura dal chantun Grischun; 2014 Premi grischun da litteratura.

Cumparì tar la Chasa Editura Rumantscha:
– Hannes (2014)
– La rumur dal flüm (2011 e 2021)

Rut Plouda (1948) scriva poesias e prosa curta. Ses emprim cudesch Föglias aint il vent (poesias) è cumparì 1986. Dal 2000 è vegnì publitgà Sco scha nüglia nu füss. I suondan translaziuns da quell’ovra en tudestg, franzos, rumen e ladin. L’onn 2020 cumpara il titel «Verd s-chür». Rut Plouda publitgescha regularmain en divers magazins e periodicas. Ella viva a Ftan.

Rut Plouda ha retschet il Premi da promoziun dal Chantun Grischun, il Premi da l’UBS, il Premi da la Fundaziun Milly Enderlin ed il Premi Schiller svizzer.

Cumparì tar la Chasa Editura Rumantscha:
– Verd s-chür (2020)
– Sco scha nüglia nu füss / Wie wenn nichts wäre (2017)

Silvana Prinz-Filli (1976) è naschida e creschida si a Dielsdorf.
Suenter la scola primara e secundara ad Oberhasli (ZH) ha ella frequentà il gimnasi a Zuoz e suenter il Seminari da magisters grischun a Cuira.

«Pilo» (2016) è stà ina lavur da Silvana Prinz al Seminari da magisters grischun.

Marcella Pult Palmara (1945) è creschida si a Roma ed ha studegià istorgia d’art a Florenz. 1979 è ella vegnida en Svizra ed ha vivì per 8 onns a Guarda. Dapi 1991 viva e lavura ella a Cuira. Ella è stada divers onns docenta a la Scola auta da pedagogia dal chantun Grischun.

Marcella Pult ha fatg pliras lavurs da traducziun e da lectorat sin il champ da l’istorgia d’art e da la tgira da monuments, sco era diversas translaziuns litteraras (tranter auter dus romans dad Oscar Peer). Dal 2014 è cumparì tar la Chasa Editura Rumantscha la monografia «Constant Könz – Ragischs ed alas/Radici e ali/Wurzeln und Flügel».

Martin Raschèr (1920) è creschì si a Zuoz. Suenter la scolaziun al seminar da magisters a Cuira ha el absolvì la scola da sutuffizier ed ha prestà bunamain 3 onns servetsch militar.
A partir dal 1943 è el stà magister a Trimmis ed a l‘internat da Freienstein/ZH, nua ch’el ha fatg dasperas il studi da pedagogia curativa. Alura è el stà 19 onns magister ad Arosa. Silsuenter ha Raschèr surpiglià la direcziun da l‘internat a Freienstein, nua ch‘el è restà fin tar sia pensiun. Suenter la pensiun fin tar sia mort ha Martin Raschèr vivì a Grub/AR.

Il cudesch «Ova da savun/Seifenwasser» è cumparì dal 2012 tar la Chasa Editura Rumantscha.

Anna Ratti (1947) è naschida a Malögia e creschida si amez in battibugl linguistic cun rumantsch, talian, bregagliot, lumbard e tudestg. Scolas a Malögia, Samedan e Basilea. Emprendissadi da librarista a Cuira. Diversas activitads tar la Fundaziun Salecina, tar la Biblioteca Chantunala e lavur politica per divers onns.
Anna Ratti è mamma da dus uffants creschids, intermediatura culturala e raquintadra da paraulas ed istorgias.
Ella ha publitgà istorgias en la retscha da la Chasa Paterna (“L’üsch nair”, 2012) ed en la Litteratura.

«La chesa dals sömmis» è cumparì dal 2021 sco tom 6 en la retscha Ord chadaina.