Kategorie: auturAs

Walter Rosselli è naschì l’onn 1965 a Preonzo e viva en Svizra franzosa. El ha studegià lingua e litteratura rumantscha, iberica e scandinava a Friburg e Turitg.
El lavura sco translatur liber per catalan, franzos, rumantsch, spagnol e talian.
El ha publitgà 2017 ‹Questione di memoria› ed il 2018 ‹Babilonia sui generis›.
Walter Rosselli ha retschavì il 2014 il Premi Terra Nova da la Fundaziun Schiller Svizra per sia translaziun dal roman  dad Oscar Peer, ‹La Vieille maison›.
www.wrossell.net

Dal 2019 è cumparì tar la Chasa Editura Rumantscha «Cuntradas imaginarias» sco tom 3 da la retscha Ord chadaina.

Tresa Rüthers-Seeli (1931) è naschida e creschida si a Falera. Ella ha absolvì il seminari da magistra manila, ha lavurà sco aupair a Paris, dà curs per la scolaziun da dunnas e fatg la scolaziun da lavurera sociala.
1962 ha ella maridà Bernd Rüthers e lura vivì cun sia famiglia en Germania; ella viva oz en il chantun Turgovia.
Dapi passa 60 onns ha ella publitgà lirica en divers magazins ed en antologias. 1987 è cumparì ses emprim cudesch ‚Tras melli veiders‘, 2003 il cudisch biling ‚Jeu sai … e sai da nuot/Ich weiss … und weiss von nichts‘.
Tresa Rüthers-Seeli ha retschavì il premi da renconuschientscha dal chantun Grischun ed il premi da la fundaziun svizra Schiller.

Dal 2015 è cumparì tar la Chasa Editura Rumantscha il cudesch da poesias biling «Aunc melli stads/Noch tausend Sommer».

Laura Schütz (*2002) è naschida e creschida si a Falera en ina famiglia bilinga cun rumantsch e tudestg. Ella studegia giurisprudenza a l’universitad da Friburg. Leger e scriver eran da pitschen ensi passiuns da Laura.  Il raquint istoric «Hotel Destin» (2021) ha ella scrit a chaschun da sia lavur da matura a la Scola chantunala a Cuira. Perquai ch’ella na vuleva betg sa decider per ina lingua u l’autra, ha ella entretschà omaduas en sia istorgia.

Leta Semadeni è naschida 1944 a Scuol. Ella ha studegià linguas a l’universitad da Turitg, en l’Equador ed en l’Italia.

2001 è cumparida la collecziun da poesias Monolog per Anastasia /Monolog für Anastasia (Nimrod), 2006 Poesias da chadafö /Küchen-gedichte (Uniun dals Grischs) e dal 2010 In mia vita da vuolp/In meinem Leben als Fuchs.

Semadeni lavura dapi 2005 independentamain e viva a Lavin.

Sper pliras incumbensas da la Pro Helvetia e divers stipendis en ateliers ha Leta Semadeni retschavì 2007 il premi da renconuschientscha dal chantun Grischun e 2011 il premi grischun da litteratura sco era il premi da la Fundaziun Schiller svizra.

Verner Solèr (1968) è creschì si sco figl da purs a Vrin ed emmigrà cun 20 onns en l’America. El ha studegià film a l’Universitad da Los Angeles e fotografia al Stana Monica College.

1999 ha el entschet sco directur d’art tar l’agentura Saatchi & Saatchi a Los Angeles, nua ch’el ha sviluppà pliras campagnas che han retschet gronda renconuschientscha. Sia experientscha sco narratur sa mussa fitg en la qualitad dals maletgs; per far quels prenda el adina avunda temp.

Dapi 1990 è Verner Solèr sa deditgà sper la lavur sco directur d’art a la fotografia, pli tard era al scriver sco furma d’expressiun. El ha lantschà plirs projects d’art, sco exposiziuns da fotografias, nua ch’i vegniva adina dumandà suenter ina publicaziun da ses maletgs.

«Vrin – Home through an Emigrants Lens/Flüchtige Heimat/Bandunar e mai schar dar» è cumparì dal 2024 tar la Chasa Editura Rumantscha.

Rico Tambornino è naschì 1950 a Trun ed ha frequentà là las scolas dal vitg. Suenter la patenta da scolast primar ed il diplom en pedagogia curativa ha el instruì l’emprim a Curaglia e lura entochen la pensiun a Cuira, nua ch’el viva oz.
Tambornino ha scrit differents texts per gasettas e revistas sco era cudeschs per uffants e creschids.

En rumantsch: Igl Uaul Grond, Ratuzin, La tschendra dil temps, Ils fantoms da Firenza ed Il scutinem dallas olmas (2018).
En tudestg: Eiszeitjäger, Jakobs gestörtes Verhältnis zum Schnee.

Vincenzo Todisco (*1964) è naschì sco figl d’immigrants talians a Stans ed ha studegià romanistica a Turitg. Oz viva el sco autur e dozent a Razén.

El è vegnì undrà l’onn 2005 cun il Premi da litteratura grischun. Per ses emprim cudesch tudestg, „Das Eidechsenkind“ è el vegnì nominà dal 2018 per il Premi da cudeschs svizzer.

Vincenzo Todisco è professur per «didactica plurilingua integrada» a la Scola auta da pedagogica grischuna nua ch’el instruescha tranter auter ils moduls litteratura per uffants e giuvenils e scriver creativ.

«Luna – Eine Nacht im Museum/Ina notg en il museum/Una notte al museo» (2019) è stà in’incumbensa dal Museum d’art dal Grischun.

Leo Tuor (1959) è creschì si a Rabius/Sumvitg. El ha studegià filosofia, istorgia e litteratura a Turitg, Fribourg e Berlin e serrà giu il studi da scolast secundar.

El ha publitgà la trilogia Giacumbert Nau (1988, octopus), Onna Maria Tumera (2002, octopus), Settembrini (2006, Ediziuns Romania). Dal 1994 al 2000 ha el commentà ensemen cun Iso Camartin l’ediziun cumpletta da Giacun H. Muoth (octopus).

Tuor è translatur da Brecht, Molière, Shakespeare e Cendrars.

Tranter auter ha Leo Tuor guadagnà dal 2007 il Premi Schiller e dal 2009 il Premi grischun da litteratura.

www.tuors.ch

Cumparì tar la Chasa Editura Rumantscha:
– Il spért e la Val/Der Geist und das Tal (2016, cudesch auditiv)
– Catscha sil capricorn en Cavrein (2012)

Jessica Zuan (1984) è creschida si en l’Engiadin’Ota a La Punt Chamues-ch e Segl Maria e viva, scriva e lavura uss a Barcelona.

Dad ella èn cumparids tranter auter: L’orizi / La tempête (Samizdat, 2017), Stremblidas e s-chima (Chasa Editura Rumantscha, 2019) e Launa da pavagls (Chasa Editura Rumantscha, 2023). Sias ovras èn vegnidas translatadas en tudestg, franzos e catalan e singulas poesias en talian, galizian polac, basc, rumen ed eston. Astrid Alexandre, Martina Linn, Bruno Pedretti ed Artem Pervushin han mess en musica divers da ses vers.

L’autura publitgescha regularmain en revistas ed antologias, è commembra da la suprastanza da la ULR (Uniun per la Litteratura Rumantscha) e co-redactura da la revista ‚La Litteratura‘.

Per sia lavur cun il pled ha Jessica Zuan survgnì in Premi da promoziun culturala dal chantun Grischun ed in Premi da promoziun da la Regiun Malögia. Il schaner 2024 ha l’autura retschet il premi Nollegiu da Barcelona ed il medem onn il Premi grischun da litteratura.

Cumparì tar la Chasa Editura Rumantscha:
– Launa da pavagls (2023)
– Stremblidas e s-chima (2019)

Foto: Mayk Wendt