Kategorie: auturAs

Hubert Giger (1958) è naschì a Matergia en la Val Medel e creschì si là. El ha studegià istorgia a l’universitad da Turitg ed è sa spezialisà sin la scienza da strias dal Grischun. Giger ha scrit divers texts per differentas retschas (Ischi; Calender per mintga gi). Dal 2001 ha el publitgà sia ovra da standard «Hexenwahn und Hexenprozesse in der Surselva» en la collecziun «Quellen und Forschungen zur Bündner Geschichte».

Sia ovra da success «La stria da Dentervals» è cumparida dal 2011 tar la CER ed en il fratemp era per tudestg e franzos.

Toni Halter (1914-1986) è creschì si a Valata/Surcuolm. El è stà scolast secundar a Vella ed è s’engaschà per la cultura e politica locala e regiunala.
Halter ha publitgà numerusas ovras, tranter auter: «Fumegl Bistgaun», «Il misteri da Caumastgira», «Patricia», «Fein selvadi», «Culan da Crestaulta» (Chasa Editura Rumantscha), «Il cavalè dalla Greina» e «Diari suenter messa».

Toni Halter ha retschavì il premi da la Cuminanza rumantscha da radio e televisiun ed il premi grischun da cultura.

Asa Hendry (1999) lavura en il sectur da litteratura, teater e performance. Iel è creschì si a Vella en Val Lumnezia, ha studegià scienza da teater e gender studies a Berna e scienza da teater applitgada a l’Universitad da Justus Liebig a Giessen en Germania. Asa Hendry ha retschavì l’onn 2021 il Premi grischun da litteratura per ses roman «Sin lautget» ed è vegnì undrà il 2026 cun il Premi svizzer da litteratura per ses text da teater «archiv».
Asa Hendry viva a Giessen ed en il Grischun. Iel scriva e reflectescha al cunfin tranter muntogna e queerness.

Chatrina Josty (1984) è creschida si a Bravuogn. Ella ha lavurà divers onns sco redactura e moderatura tar Radiotelevisiun Svizra Rumantscha e suenter sco magistra da scola primara. Ella ha scrit divers «Impuls» per il Radio Rumantsch ed ha publitgà texts da divers geners en antologias, tranter auter en «mintga di» (2015).

«Barbacor – Herzkater» è cumparì sco tom 1 en la retscha Ord chadaina (2018).

Luzius Keller (1938) ha studegià a Turitg, Genevra e Firenza. Segiurns a Roma, Firenza e Berlin. Dal 1970 fin al 2003 professer per scienza litterara franzosa a l’Universitad da Turitg. Publicaziuns en connex cun la litteratura dapi la renaschientscha, en spezial davart Marcel Proust. Editur da l’ediziun da Francfurt da las ovras da Proust (14 toms), coeditur da l’enciclopedia da Proust (2009). Plinavant studis davart la lirica da la Svizra quadrilingua, tranter auter l’antologia Modern and Contemporary Swiss Poetry (2012).

«Quarta Lingua Quadrophon» è cumparì sco tom 2 en la retscha Ord chadaina (2018).

Göri Klainguti (1945) è in scrivent e pur da l’Engiadin’Ota. El ha studegià a l’universitad da Turitg ed è sa deditgà suenter plirs onns sco magister dal tut al scriver e dissegnar. Sper las activitads artisticas ha el manà in bain puril a Samedan.
Göri Klainguti ha publitgà regularmain en il «Chalender Ladin» ed en la «Chasa Paterna» e scrit contribuziuns per l’emissiun «Impuls» da RadioTelevisiun Rumantscha.

El ha publitgà pliras ovras, tranter auter: «Linard Lum» (UdG); «L’ü» (UdG) e «Na, ogets nu discuorran!» (Chasa Editura Rumantscha).

Tim Krohn (1965) è autur da numerus romans e teaters. El viva cun sia dunna, la scriptura Micha Friemel, e lur quatter uffants a Sta. Maria en Val Müstair. Els mainan là era la Chasa Parli, in lieu da retratga per artistas ed artists e per persunas reflectantas. www.chasa-parli.ch

El ha scrit il text da basa per il comic «Pippin il patgific», cumparì tar la Chasa Editura Rumantscha (2021).

Peider Lansel (1863-1943) è naschì a Pisa, nua che ses geniturs – omisdus oriunds da l’Engiadina – manavan ina fatschenta da colonialas. Cun 9 onns ha el visità la scola a Sent, lura la Scola chantunala a Cuira e pli tard la Scola commerciala a Frauenfeld. Cun 16 è el turna a Pisa ed ha surpiglià la fatschenta da famiglia.

L’onn 1906 è el turnà cun sia dunna e ses uffants en Svizra ed ha entschiet a promover cun ses texts ed artitgels ina renaschientscha dal rumantsch, empruvond da liberar la lingua scritta da las influenzas talianas e tudestgas e dal moviment da l’irredentissem talian che vuleva cumprovar ch’il rumantsch saja in dialect talian.

Lansel ha publitgà atgnas ovras en ediziuns bibliofilas, edì las antologias da lirica Musa Ladina e Musa Rumantsch e confundà il Chalender Ladin.
L’onn 1926 è el stà oblià da turnar en ils affars en Italia, in onn pli tard è el vegnì nominà Consul da la Svizra a Livorno. Dal 1934 è Lansel turnà definitivamain en Svizra. Dal 1933 ha l’Universitad da Turitg numnà el doctor honoris causa per ses gronds merits per la defensiun dal rumantsch e per sia ovra poetica e dal 1943 ha el retschet sco emprim Rumantsch il Premi da la Fundaziun Schiller Svizra.

Dal 2012 è cumparì tar la Chasa Editura Rumantscha il titel Peider Lansel – Essais, artichels e correspundenza.

Leontina Lergier-Caviezel (1956) è creschida si a Vrin en Val Lumnezia e viva en la vischinanza da Berna.
Ella ha publitgà raquints e poesias en diversas periodicas rumantschas ed ha scrit regularmain columnas per La Quotidiana.
Ses emprim cudesch Romana è cumparì 2006 en la retscha da Nies Tschespet (Romania).

Cumparì tar la Chasa Editura Rumantscha:
– Davos ils mugrins (2018)
– Nus duas (2011)

Giachen Mihel Nay (1860 – 1920) valeva sco persuna originala ed era gia da ses temp in autur fitg popular.
Suenter il gimnasi ha el studegià medischina a Basilea. Nay è stà medi a Trun ed a Tusaun. Durant plirs onns è el er stà deputà en il Cussegl grond. Ina passiun da Nay era il puresser. A Trun/ Lumneins ha el pudì cumbinar idealmain l’activitad da medi cun quella da pur.

Giachen Mihel Nay è stà in dals emprims auturs da prosa sursilvans, el era in bun observatur e tschiffava cun ses raquints en la vita dals carstgauns sco els èn, las figuras cumenzan a viver. Ses text il pli enconuschent è La vacca pugniera, e lura sias raquintaziuns Clau Miedi ed Il barun de Muntatsch.

Dal 2020 è cumparì tar la Chasa Editura Rumantscha il titel Tgil e tgau en treglia en la retscha dals classichers commentads.